వైఎస్‌ఆర్‌ను విమర్శిస్తే తాటతీస్తాం: మంత్రి వైఎస్.వివేకా

తన సోదరుడు, దివంగత ముఖ్యమంత్రి వైఎస్.రాజశేఖర్ రెడ్డిని ఎవరైనా విమర్శిస్తే తాటతీస్తామని (ఊరుకోమని) రాష్ట్ర వ్యవసాయ శాఖామంత్రి వైఎస్.వివేకానంద రెడ్డి హెచ్చరించారు. తాను తప్పుచేసినట్టు రుజువైతే తన మంత్రి పదవికి రాజీనామా చేసేందుకు సిద్ధంగా ఉన్నట్టు ఆయన ప్రకటించారు. సోమవారం సభలో 'వైఎస్ దొంగల ముఠా' అంటూ ప్లకార్డురు ప్రదర్శించిన ప్రతిపక్ష తెలుగుదేశం పార్టీ సభ్యులపై వైఎస్ వివేకానంద రెడ్డి, జగన్ వర్గం ఎమ్మెల్యేలు బండబూతులు తిడుతూ భౌతిక దాడులకు దిగిన విషయం తెల్సిందే. ఈ సంఘటన తర్వాత మంత్రి వివైకాను ముఖ్యమంత్రి కిరణ్ కుమార్ రెడ్డి తన ఛాంబర్‌కు పిలుపించుకుని మాట్లాడారు.

అనంతరం వైఎస్ వివేకా మీడియాతో మాట్లాడుతూ దివంగత నేత వైఎస్ రాజశేఖర్ రెడ్డిపై విమర్శలు చేస్తే సహించేది లేదని తేల్చి చెప్పారు. అవసరమైతే మంత్రి పదవికి రాజీనామా చేస్తానని ఆయన ముఖ్యమంత్రి కిరణ్‌కుమార్‌రెడ్డికి స్పష్టం చేసినట్లు వినికిడి. అయితే వివేకానందరెడ్డి రాజీనామా యోచనను ముఖ్యమంత్రి వారిస్తున్నట్లు సమాచారం.