వర్మ "దొంగల ముఠా" ఐదు రోజుల చిత్రం కాదట...

రామ్‌గోపాల్‌వర్మ ఏం చెప్పినా... ఏం చేసినా... అది అసలు కాదు. నకిలీ అనుకోవాల్సిందే... సినిమా పిచ్చిగా తీస్తున్నారంటే.. నేనలానే తీస్తా.. మిమ్మల్ని చూడమని చెప్పలేదే.. అంటాడు. ఇటీవలే రవితేజ, చార్మితో ఐదు రోజుల్లో 'దొంగలముఠా' షూటింగ్‌ పూర్తి చేశానని పబ్లిసిటీ విపరీతంగా ఇచ్చుకున్న వర్మ... ఆ చిత్రాన్ని మళ్ళీ రీషూట్‌ చేసి మరో ఐదు రోజులు చేశాడనే వార్త ఇండస్ట్రీలో బయటపడింది. ఆ చిత్రంలో ఓ పాట ఉంది. దాన్ని ఎలా తీయాలో తెలీక... 'మిరపకాయ్‌' దర్శకుడు హరీష్‌శంకర్‌ను ఆశ్రయించాడట. దాన్ని షూట్‌ చేయడానికి మూడు రోజులు పట్టిందట. మళ్లీ లైటింగ్‌ సరిగ్గాలేదని మరో రెండు రోజులు రీషూట్‌ చేశాడని తెలిసింది.

ఇది తెలిసి వర్మ సన్నిహితులను అడిగితే... వర్మ అలాగే చెబుతారు. మీరు నమ్మారుగదా... అంతా అయిపోయిందిగదా... టీవీలు, పేపర్లలో ఐదు రోజుల్లో షూటింగ్‌ అని వేశారు కదా? అంటే మీరు కూడా తప్పు రాశారా? అందులో మీ భాగం కూడా ఉన్నట్లే కదా.. అంటూ లాజిక్కు చెబుతున్నారు. అదీ ఐదు రోజుల దొంగల ముఠా సినిమా సంగతి.