బాబు అధికారంలో ఉండగా, ఆయన స్వయంగా మితిమీరి ప్రోత్సహించిన ఒక మీడియా సంస్థ యజమాని ఇప్పుడు హరి వర్గానికి రాజగురువుగా అవతరించినట్లు దేశం వర్గాలు బాహాటంగానే చెబుతున్నాయి. లోకేష్‌కు వ్యతి రేకంగా హరికృష్ణ వర్గం ఆ మీడియా సంస్థ ద్వారా గత కొద్దిరోజుల నుంచి కావాలనే వ్యతిరేక కథ నాలు వెలువరిస్తున్న వైనాన్ని వారు తమ అను మానానికి మద్దతుగా చూపిస్తున్నారు. సందర్భం లేకపోయినా కుటుంబ సమరాన్ని ప్రస్తవించడం ద్వారా పార్టీ చీలిపోనుందన్న ప్రచారంతో పార్టీ నేతల్లో కొత్త ఆలోచనలకు తెరలేపిందంటున్నారు.
తెలుగుదేశం పార్టీ అధినేత చంద్రబాబునాయుడుపై తిరుగుబాటు అంకానికి నందమూరి కుటుంబ సభ్యులే తెరలేపడం ఆసక్తికరంగా మారింది. ఎన్టీఆర్‌ కుమార్తె పురంధేశ్వరి కర్త-కర్మ-క్రియగా భావిస్తోన్న ఈ తిరుగుబాటు వ్యవహారంలో.. హరికృష్ణ మరోసారి కీలకపాత్ర పోషిస్తున్నట్లు చెబుతున్నారు. గతంలో ఒకసారి బాబుపై తిరుగు బాటుకు విఫలయత్నం చేసి, స్వయంగా తానే డిపాజిట్‌ కూడా దక్కని అవమానకర పరిస్థతిలో ఓడిపోయి మళ్లీ పార్టీలో చేరిన విషయాన్ని గుర్తు చేస్తున్నారు. ఇప్పుడు మళ్లీ కొత్త రూటులో హరికృష్ణ తిరుగుబాటు ప్రయత్నాలు చేస్తున్నట్లు పార్టీ వర్గాలు చెబుతున్నాయి.
ఆయన సోదరి పురం దేశ్వరి దిశానిర్దేశంలో హరికృష్ణ నడుస్తున్నారని, ఆ మేరకు కృష్ణా జిల్లాకు చెందిన నాని, వంశీలతో వ్యతిరేక వ్యాఖ్యలు చేయించారన్న అనుమానాలు వ్యక్తయమవుతున్నాయి. నిజానికి హరికృష్ణను నాయకత్వం ప్రోత్సహించడాన్ని ఎవరూ సమర్ధిం చడం లేదు. కేవలం ఎన్టీఆర్‌ కుమారుడన్న పేరు తప్ప, ఆయన పార్టీకి చేస్తున్నదేమీలేదన్న విమర్శలు వస్తున్నాయి. పార్టీని పటిష్ఠంచేయవలసిన ఈ సమయంలో ఆయనే స్వయంగా సమస్యలు సృష్టించడం బట్టి నాయకత్వ సామర్ధ్యం ఏ స్థాయిలో ఉందో అర్ధమవుతోందని సీనియర్‌ నేతలు చెబుతున్నారు.
త్వరలో జరగనున్న కేంద్ర మంత్రివర్గ విస్తరణలో క్యాబినెట్‌ సీటు దక్కించుకోవాలన్న లక్ష్యంతో ఉన్న పురంధేశ్వరి.. తన లక్ష్య సాధన కోసం రాష్ట్రంలో తెలుగుదేశం పార్టీని చీల్చి కాంగ్రెస్‌కు ప్రయోజనం కలిగిస్తానని ఇటీవల సోనియాను కలిసిన సందర్భంగా హామీ ఇచ్చారని, ఆ మేరకు తన సోదరులను వ్యూహాత్మకంగా చంద్రబాబునాయుడు నాయకత్వాన్ని సవాల్‌ చేసేలా హరి అనుచరులతో ప్రకటనలు ఇప్పించారని దేశం వర్గాలు విశ్లేషిస్తున్నాయి. అసలు హరికృష్ణనే నాని, వంశీకి ఫోన్‌ చేసి దేవినేని ఉమాపై ఆరోపణలు చేయించారన్న ప్రచారం జరుగుతోంది.
తన కుమారుడు జూనియర్‌ ఎన్టీఆర్‌ పార్టీలో క్రియాశీల పాత్ర పోషించాలని, బాబు తర్వాత పార్టీ పగ్గాలు తన కుమారుడికే దక్కాలని కోరుకుంటున్న హరికృష్ణకు.. బాబు తన కుమారుడు లోకేష్‌ను ఎక్కువగా ప్రోత్సహించడం హరికి రుచించడం లేదంటున్నారు. అటు జూనియర్‌ ఎన్టీఆర్‌కు సైతం పార్టీలో క్రియాశీల పాత్ర పోషించాలన్న ఉత్సాహం ఉన్నప్పటికీ లోకేష్‌ ముందుకు వస్తుండటంతో ఎన్టీఆర్‌ తన ఆశను బలవంతంగా అణచివేసుకుంటున్నారు.
హరికృష్ణ అసమ్మతిని ఆయన సోదరిపురంధేశ్వరి కేంద్ర క్యాబినెట్‌ మంత్రి కావాలన్న తన లక్ష్యసాధనకు వినియోగించుకుంటున్నట్లు పార్టీ వర్గాలు విశ్లేషిస్తున్నాయి. సహజంగా ఆవేశపరుడైన హరికృష్ణ ను రెచ్చగొట్టడం ద్వారా ..ఆమె తన లక్ష్యసాధనకు దగ్గర దారులు వేసుకుంటున్నారని, పార్టీ పగ్గాలు నందమూరి కుటుంబానికే చెందాలంటూ ఆమె తన సోదరులకు నూరిపోస్తున్నారని పార్టీ వర్గాలు చెబుతున్నాయి. వ్యూహం, ఎత్తుగడ, రాజకీయ జిమ్మిక్కులు తెలియని నందమూరి కుటుంబం అనవసరంగా పురంధేశ్వరి , ఆమెకు మద్దతుగా ఉన్న మీడియా సంస్థ చేతిలో పావులుగా మారారన్న ఆవేదన పార్టీ నేతల్లో వ్యక్తమవుతోంది.
నందమూరి కుటుంబాన్ని బాబుపై రెచ్చగొట్టడం ద్వారా, పార్టీని చీల్చి అధిష్ఠానం వద్ద పలుకుబడి పెంచుకోవాలన్న వ్యూహంతోనే పురంధేశ్వరి పావులు కదుపుతున్నారని టీడీపీ వర్గాలు అనుమానిస్తున్నాయి. పార్టీని చీల్చిన ఘనత దక్కించుకుని, రాష్ట్ర కాంగ్రెస్‌ పార్టీపై పట్టు సంపాదించాలన్న వ్యూహంతో అడుగులు వేస్తున్నారంటున్నారు. అవసరమైతే రాష్ట్ర పగ్గాలు చేపట్టే ముందస్తు ఎత్తుగడ కూడా అవలంబిస్తున్నారు.
అందులో భాగంగానే.. గత కొద్దికాలం నుంచి బాబు నాయకత్వానికి వ్యతిరేకంగా వ్యవహరిస్తున్న సొంత సామాజికవర్గానికి చెందిన ఒక మీడియా సంస్థ యజమాని ద్వారా బాబు-లోకేష్‌కు వ్యతిరేకంగా వార్తా కథనాలు ప్రచారంలోకి పెడుతున్నట్లు పార్టీ వర్గాలు బాహాటంగానే చెబుతున్నాయి. సదరు మీడియా సంస్థల యజమాని ఇప్పుడు హరికృష్ణ వర్గానికి రాజగురువుగా వ్యవహరిస్తున్నారంటున్నారు. టీడీపీ పగ్గాలు నందమూరి కుటుంబానికి దక్కితే భవిష్యత్తులో తానే నందమూరి కుటుంబానికి రాజగురువుగా ఉండవచ్చన్న ముందుచూపుతోనే బాబు-లోకేష్‌ పై వ్యతిరేక కథనాలు రాయిస్తూ, పార్టీ శ్రేణుల్లో వ్యూహాత్మకంగా గందరగోళం సృష్టిస్తున్నారని టీడీపీ నేతలు విశ్లేషిస్తున్నారు.
No comments:
Post a Comment