ధోనీ.. వెరీ ఇంటలిజెంట్ అండ్ స్మార్ట్: కుమార సంగక్కర

టీమిండియా కెప్టెన్ మహేంద్ర సింగ్ ధోనీపై శ్రీలంక సారథి కుమార సంగక్కర ప్రశంసల వర్షం కురిపించాడు. ముంబైలో జరిగిన ప్రపంచకప్ ఫైనల్లో జట్టును విజయపథంలో నడిపించి, వరల్డ్ కప్ గెలిచేలా చేసిన కెప్టెన్ ధోనీ వెరీ ఇంటలిజెంట్ అండ్ వెరీ స్మార్ట్ అని కుమార సంగక్కర కొనియాడాడు. ప్రపంచకప్ ఫైనల్ మ్యాచ్‌ అయినప్పటికీ ధోనీ ఎలాంటి ఒత్తిడికి గురికాకుండా కూల్‌గా జట్టును సమర్థవంతంగా నడిపించాడని సంగక్కర వ్యాఖ్యానించాడు. అలాగే ఫైనల్స్‌లో గౌతం గంభీర్ అద్భుత ఇన్నింగ్స్ ఆడాడని తెలిపాడు. యువ బ్యాట్స్‌మెన్ విరాట్ కోహ్లీ గంభీర్‌కు మంచి భాగస్వామ్యం నెలకొల్పాడని సంగక్కర చెప్పాడు.

మరోవైపు మ్యాన్ ఆఫ్ ది టోర్నీ అవార్డును గెలిచిన యువరాజ్ సింగ్ మాట్లాడుతూ.. మాస్టర్ బ్లాస్టర్ సచిన్ టెండూల్కర్ కోసం ప్రపంచకప్ గెలవాలనుకున్నామని, సమిష్టి కృషితో వరల్డ్ కప్ ట్రోఫీని సొంతం చేసుకున్నామన్నాడు. పరిమిత ఓవర్ల ప్రపంచకప్‌ను గెలుచుకోవడాన్ని నమ్మలేకపోతున్నామని యువీ చెప్పాడు.

సచిన్‌తో పాటు దేశ ప్రజల ఆకాంక్ష కోసం టీమిండియా సభ్యులంతా సమిష్టిగా రాణించారని యువరాజ్ సింగ్ తెలిపాడు. అండర్-19 వరల్డ్ కప్, ట్వంటీ-20 ప్రపంచకప్‌లు గెలిచినా, వన్డే ప్రపంచకప్ తమకు చాలా ప్రత్యేకమైందని యువీ వ్యాఖ్యానించాడు.

ఇకపోతే.. బౌలింగ్, బ్యాటింగ్ వంటి అన్ని విభాగాల్లో సమిష్టిగా రాణించడం వల్లే టీమిండియా విశ్వవిజేతగా నిలిచిందని భారత క్రికెట్ చీఫ్ సెలెక్టర్ కృష్ణమాచారి శ్రీకాంత్ అన్నారు. వరల్డ్‌కప్ మెగా ఈవెంట్‌లో అగ్రశ్రేణి జట్లను ఓడించి భారత్ మరోసారి అత్యుత్తమ జట్టుగా నిరూపించుకుందని తెలిపారు. ప్రపంచంలోనే భారత క్రికెట్ జట్టు బెస్ట్ అని శ్రీకాంత్ కొనియాడారు.