సీమాంధ్ర కాంగ్ ఎంపీల్లో ఆందోళన..

 రాష్ట్ర విభజన ప్రకటనతో సీమాంధ్ర ఎంపీల్లో ఆందోళన మొదలైంది. సమైక్యాంధ్ర సంగతి అటుంచితే తమ వ్యక్తిగత రాజకీయ భవిష్యత్తు ఏంటనే ఆలోచనలో పడ్డారు. రాజీనామాలు చేసి ఉద్యమం చేద్దామని కొందరు పట్టుబడుతుంటే, మరికొందరు వ్యతిరేకిస్తున్నారు. ఇంకొందరు పార్టీ మారాలనుకుంటున్నారు. ఇప్పటికే కొంతమంది ఎంపీలు ఇతర పార్టీలతో సంప్రదింపులూ జరుపుతున్నారు. అయితే

మరోవైపు తాము రాజీనామాలు చేస్తామని చెప్పినా అధిష్టానం రాష్ట్ర విభజన తప్పదనడంతో వారిలో రాజకీయ భవిష్యత్తుపై ఆందోళన మొదలైంది. కనీసం 2014 సంవత్సరం ఎన్నికల వరకు రాష్ట్ర విభజన జరగకుండా చూడాలని అధిష్టానాన్ని కోరాలని భావిస్తున్నారు. విభజన జరిగితే రాజకీయంగా తీవ్రంగా నష్టపోతామన్న భయం వారిని వెంటాడుతోంది.

అయితే ఎంపీలకు, కేంద్ర మంత్రులకు రాష్ట్ర విభజన అంశం తెలియంది కాదని, వారితో చర్చించాకే అధిష్టానం నిర్ణయం తీసుకున్నట్టు ప్రచారం జరుగుతోంది. అందుకే అధిష్టానం వద్ద గట్టిగా తమ వాదన వినిపించలేకపోతున్నారన్న విమర్శలున్నాయి. విభజన తథ్యమని తెలిసినా వారి ఆందోళనంతా వ్యక్తిగత రాజకీయ భవిష్యత్తుపైనే అంటూ టి కాంగ్రెస్‌ నేతలు ఎదురుదాడి చేస్తున్నారు. అందుకే సీమాంధ్ర నేతలు ఎవరిదారి వారు చూసుకుంటున్నట్టు తెలుస్తోంది. కొంతమంది సీమాంధ్ర కాంగ్రెస్ ఎంపీలు పార్టీ మారే ఆలోచనలో ఉన్నట్లు సమాచారం. ఈ దిశగా వారు ఆయా పార్టీలతో సంప్రదింపుల్లో బిజీగా ఉన్నట్టు కాంగ్రెస్‌ వర్గాలు చెప్పుకుంటున్నాయి. జగన్‌ పార్టీ పెట్టాక చాలా మంది ఎంపీలు ఫిరాయింపులకు మొగ్గుచూపారు. మేకపాటి గతంలోనే వైసీపీ గూటి కి చేరారు. సబ్బంహరి లాంటి వాళ్లు మధ్యలో ఊగిసలాడారు. మరికొంతమంది వైసీపీలో చేరదామని భావించిన సమయంలో జగన్ అరెస్టుతో ఆగిపోయారు. జగన్ ఎప్పుడు జైలు నుంచి బయటకు వస్తాడో అన్న అనుమానం, జనాల్లో కూడా ఆ పార్టీ పట్ల సానుభూతి తగ్గుముఖం పట్టడంతో వెనక్కు తగ్గారు. పంచాయితీ ఎన్నికల్లో కాంగ్రెస్‌కు ఫలితాలు అనుకూలంగా రావడంతో ఎంపీలు కాంగ్రెస్‌లోనే కొనసాగుతున్నారు.

కానీ ఇప్పుడు తెలంగాణ రాష్ట్ర ఏర్పాటుకు కాంగ్రెస్‌ వర్కింగ్‌ కమిటీ అనుకూల నిర్ణయం తీసుకోవడం, జగన్‌ సమైక్యాంధ్రకు జై కొట్టడంతో ఎంపీల మనసు మళ్లీ అటుగా మళ్లుతోంది. కాంగ్రెస్‌ పట్ల జనాల్లో వ్యతిరేకత పెరుగుతోంది. ఎన్నికల్లో గట్టెక్కాలంటే రాజీనామాలు చేసి వైసీపీ తీర్ధం పుచ్చుకోవడమే మార్గమని కొందరు కాంగ్రెస్‌ ఎంపీలు అంటున్నారు. ఇప్పటికే అనంతపురం ఎంపీ అనంత వెంకట్రామిరెడ్డి సంప్రదింపులు జరుపుతున్నారని జోరుగా ప్రచారం ఉంది. అయితే దీనికి స్థానిక ఎమ్మెల్యే గుర్నాథ రెడ్డి సహా పలువురు నేతలు అడ్డుపడుతున్నట్టు తెలుస్తోంది. ఇక కడప జిల్లాలో సాయిప్రతాప్‌ కూడా వైసిపిలో కలిసే అవకాశముందని ప్రచారం జరుగుతోంది. మరికొంతమంది ఎంపీలతో వైసీపీ నేతలు బేరసారాలు జరుపుతున్నారు. ఇదిలావుంటే కాంగ్రెస్‌ ఎంపీల్లో రాజీనామాలపై భిన్నాభిప్రాయాలు రావడానికి ఫిరాయింపులే కారణమని తెలుస్తోంది. పార్టీ మారడానికి సిద్ధంగా ఉన్న నేతలే రాజీనామాలకు పట్టుబడుతున్నారని సీమాంధ్ర కేంద్ర మంత్రులు తమ సన్నిహితుల వద్ద చెబుతున్నారు. రాజీనామాల వల్ల పార్లమెంట్‌లో బిల్లు వచ్చినప్పుడు వ్యతిరేకంగా ఓటేసే అవకాశాన్ని కోల్పోతామని వారంటున్నారు. కానీ వ్యక్తిగత ఎజెండాలు పెట్టుకుని రాజీనామాలు చేద్దామని బలవంతం చేయడంపై సీనియర్‌ ఎంపీలు, మంత్రులు ఇటీవల నిర్వహించిన ఆ పార్టీ సమావేశంలో ఆగ్రహం వ్యక్తం చేసినట్లు తెలుస్తోంది.