దూకుడు పెంచిన టీ కాంగ్ నేతలు..!

ఒకపక్కటీఆర్‌ఎస్‌ విమర్శలు, మరోపక్క టీ కాంగ్రెస్‌ నేతలు మౌనంగా ఉంటున్నారంటూ టీ జెఎసి మాటల దాడులు. ఈ నేపథ్యంలో గత కొంతకాలంగా మౌనంగా

ఉన్న టీ కాంగ్రెస్‌ నేతలు దూకుడు పెంచేందుకు సిద్ధమయ్యారు. ఢిల్లీలో మళ్లీ లాబీయింగ్‌ చేయాలని నిర్ణయించారు. సీమాంధ్ర లీడర్ల ప్రయత్నాలకు కౌంటర్‌ ఇవ్వాలనేది టి కాంగ్‌ నేతల ప్లాన్‌. మినిస్టర్‌ క్వార్టర్స్ లో ఆదివారం జరిగిన విస్తృత స్థాయి సమావేశంలో ఈ అంశాలపైనే వారు చర్చించారు. నాలుగు గంటల పాటు హాట్‌హాట్‌గా జరిగిన ఈ సమావేశంలో 8 అంశాలపై తీర్మానాలు చేశారు.
 ఈ నెల 22న ఢిల్లీ వెళ్లి అధిష్టానం పెద్దలను కలవాలని టీ కాంగ్రెస్‌ ప్రజాప్రతినిధులు నిర్ణయించారు. అక్టోబర్‌లో భారీ బహిరంగ సభను ఏర్పాటుచేయాలని తీర్మానించారు. హైదరాబాద్‌ తెలంగాణలో భాగమే అని నేతలు స్పష్టం చేశారు. పార్టీ తీసుకున్న నిర్ణయాన్ని కొంతమంది వ్యతిరేకించడం సరికాదని టీ కాంగ్రెస్‌ నేతలు అభిప్రాయపడ్డారు. అటు సీఎం వైఖరిపైనా టీ కాంగ్రెస్‌ నేతలు మండిపడినట్లు సమాచారం. సీఎం ఏకపక్షంగా వ్యవహరిస్తున్నారని, టీ మంత్రులు కేబినెట్‌ లో ఎందుకు కొనసాగుతున్నారని కొంతమంది ఎంపీలు నిలదీశారని తెలుస్తోంది. విభజన ప్రక్రియ ఆగిపోయిందంటూ సీమాంధ్ర నేతలు చేస్తున్న వ్యాఖ్యలను అధిష్టానం దృష్టికి తీసుకెళ్లాలని టీ నేతలు నిర్ణయించినట్లు సమాచారం. మరోపక్క హైదరాబాద్‌ తెలంగాణలో అంతర్భాగమని స్పష్టం చేశారు. హైదరాబాద్‌లో నివాసం ఉంటున్న సీమాంధ్ర ప్రజల ప్రయోజనాలకు ఎటువంటి భంగం కలగదని టీనేతలు భరోసా ఇచ్చారు. అయితే అంతకు ముందు ఈ సమావేశంలో కొంతసేపు గందరగోళం ఏర్పడింది. రేణుకా చౌదరి సమావేశానికి హాజరు అవడంపై కొంతమంది నేతలు అభ్యంతరం వ్యక్తం చేయడంతో ఈ గందరగోళం చోటుచేసుకుంది. గతంలో తెలంగాణకు వ్యతిరేకంగా వ్యాఖ్యలు చేసిన రేణుకా ఇప్పుడు సమావేశానికి ఎలా వస్తారని ఎంపీ పొన్నం, మాజీ మంత్రి దామోదర్ రెడ్డి నిలదీశారు. ఉద్యమంలో అందరినీ కలుపుకు పోవాలని మంత్రులు జానారెడ్డి, శ్రీధర్‌బాబు వీరికి సర్ధిచెప్పడంతో పరిస్థితి సద్దుమణిగింది. మొత్తానికి టీ కాంగ్రెస్‌ నేతలు మళ్లీ తమ స్పీడ్‌ పెంచేందుకు రెడీ అవుతున్నారు.