సస్పెన్స్..థ్రిల్లర్..'నీడ'

కథ చిన్నదైనప్పుడు కథనం బాగుంటే ప్రేక్షకులను కూర్చోబెట్టవచ్చు. ఈ సూత్రాన్ని బాగా ఒంటబట్టించుకుని 'నీడ'లా వచ్చాడు దర్శకుడు 'జెఎస్. చౌదరి'. సినిమాలో ఆయన తీసుకున్న పాయింట్ చాలా చిన్నది. అది ఆకట్టుకునేలా చెప్పడంలో దర్శకుడు చాలా వరకూ సక్సెస్ అయ్యాడు. కాకపోతే.. కొన్ని ప్రాథమిక విషయాల్లో దెబ్బతిన్నాడు. ఈ సినిమాను వి. శ్రీనివాస్ చౌదరి నిర్మించాడు.
    స్టోరీ: 'నీడ'.. రెండు రకాలు.. ఒకటి వెంటాడేది.. మరొకటి వెంట వచ్చేది. ఈ కాన్సెప్ట్ తో వచ్చిన చిత్రమే 'నీడ'.. ఒక రాత్రి జరిగే సస్పెన్స్ థ్రిల్లర్. ఒక క్రూరమైన హత్యతో సినిమా ప్రారంభమవుతుంది. ఓ పెద్ద సాఫ్ట్ వేర్ కంపెనీలో పూజ పని చేస్తుంది. ఆమెకు పెళ్లవుతుంది. అయితే రెండో రోజే ఆమె భర్త అర్జెంట్ పనిపై సింగపూర్ వెళతాడు. దీంతో ఇంట్లో బోర్ కొట్టి, పూజ ఆఫీస్ కు వెళుతుంది. అనుకోకుండా కిడ్నాప్ కు గురవుతుంది. అయితే పూజను కిడ్నాప్ చేసింది ఎవరు..? ఫస్ట్ హత్య చేసిన వాడికి పూజకు సంబంధం ఏంటీ..? అసలు పూజ భర్త ఏమయ్యాడు..? అనేది మిగతా స్టోరీ..
విశ్లేషణ: కథగా చాలా చిన్న పాయింటే.. కానీ దర్శకుడు చౌదరి తెలివిగా తెరకెక్కించాడు. మధ్యలో కొన్ని లోపాలున్నా ఓవరాల్ గా ఆడియన్స్ ను కాస్త భయపెడుతూ, కొంచెం టెన్షన్ కు గురిచేస్తూ, సస్పెన్స్ క్రియేట్ చేస్తూ రెండు గంటలకు పైగా కూర్చోబెట్టేందుకు ప్రయత్నించాడు. అయితే ఫస్టాఫ్ లో ఉన్న టెంపో సెకండాఫ్ లో లేదు. పోస్టర్ల పై రవిబాబు ఉన్నా సినిమాలో అతను ఐదు నిమిషాలు మాత్రమే కనిపిస్తాడు. ఒక రకంగా చెప్పాలంటే.. ఆ క్యారెక్టర్ వల్ల సినిమాకు ఏ ఉపయోగమూ లేదు. ఇక మిగిలిన ప్రధాన పాత్రలు... సైకోగా నటించిన 'తను', హీరోయిన్ పాని అద్భుతమైన నటన చూపకపోయినా ఫర్వాలేదనిపించారు. ఇక రీసెంట్ గా అరవింద్ -2 కు మ్యూజిక్ సమకూర్చిన విజయ్ కూరాకుల సంగీతం చాలా ప్లస్ అయింది. కొన్ని చోట్ల మ్యూజిక్ తోనే భయపెట్టగలిగాడు. అయితే ఇలాంటి సినిమాల్లో పాటలు అనవసరం. సెకండాఫ్ లో ఎడిటింగ్ ఇంకా ట్రిమ్ చేస్తే బావుండేది. కెమెరా పనితనం కూడా ఫర్వాలేదనిపించేలా ఉంది.
   అయితే అంత పెద్ద కార్పొరేట్ కంపెనీలో పనిచేస్తున్న పూజ, పదిగంటలకే కిడ్నాప్ కావడం కన్విన్సింగ్ గా లేదు. అంతే కాక, ఇప్పుడు ఏ కార్పొరేట్ కంపెనీ అయినా 24గంటలు పనిచేస్తుంది. కానీ వీళ్ల ఆఫీస్ లో పదిగంటలకే అందరూ వెళ్లిపోతారు. మరో వైపు అంత పెద్ద బిల్డింగ్ లో పది తర్వాత ఎవరూ కనిపించరని చెప్పడం అతకలేదు. సిటీలో పూజ ఫోన్ కు సిగ్నల్ అందకపోవడం ఆశ్చర్యకరం. సెకండాఫ్ లో రవిబాబు, పృథ్వి క్యారెక్టర్స్ ను మరింత వాడుకుంటే, ఇన్వెస్టిగేషన్ తరహాలో స్క్రీన్ ప్లే మరింత టైట్ గా ఉండేది. అయితే కథనం ముందు ఇవన్నీ చిన్న మిస్టేక్స్ గా అనిపిస్తాయి.
ప్లస్, మైనస్ లు : స్క్రీన్ ప్లే బాగుంది. బ్యాక్ గ్రౌండ్ స్కోర్ ఆకట్టుకునేలా ఉంది. ఇతర ఆర్టిస్టుల నటన బాగుంది. ఇక మైనస్ లు చూస్తే.. సన్నివేశాలు కొన్ని అర్థం కావు, లాజిక్ లేకుండా ఉంటాయి. పాటలు ఒక్కటి కూడా బాగలేవు. కన్ క్లూజన్ అతకలేదు.
పరిమిత బడ్జెట్ తో వచ్చిన ఈ చిన్న సినిమాను మంచి ప్రయత్నంగానే చెప్పొచ్చు. సైకో, సస్పెన్స్ థ్రిల్లర్ అయినా ఎక్కువ హింస, బూతులు లేకపోవడం సంతోషకరం. సో.. ఓవరాల్ గా థ్రిల్లర్ తరహా సినిమాలు ఇష్టపడేవారిని 'నీడ' వెంటాడి, వేటాడి ఆకట్టుకుంటుందని చెప్పవచ్చు. ఇక సినిమాకు టెన్ టివి ఇచ్చే రేటింగ్-1.75/5.