పోషకాల పంచాక్షరి

-ఈసురోమని మనుషులుంటే దేశమేగతి బాగుపడునోయ్‌... అన్నారు గురజాడ. నిజమే! సంతోషాలు పరవళ్లు తొక్కుతూ ఆరోగ్యానికి పట్టం కడితేనే ఏ దేశమైనా అభివృద్ధి బాటలో నడుస్తుంది. జీవం తొణికిసలాడే ముఖాలు.. ఉత్సాహం ఉరకలెత్తే మహిళలు ఈ దేశానికి ఎంతో అవసరం. జాతీయ పోషకాహార ఉత్సవాల సందర్భంగా అనారోగ్యాలకు దూరంగా ఉంచే.... అరోగ్యానందాలు అందించే పోషకాహార వివరాలను, నియమాలను తెలియజేస్తున్నారు డాక్టర్‌ జానకీ శ్రీనాథ్‌.

సరదాల కోసం ఖర్చుకి వెనుదీయం. అందంగా కనిపించడం కోసం సమయం వెచ్చిస్తాం. ఆధునిక ఉపకరణాల వాడకంలోనూ ముందుంటాం. కానీ పోషకాహారం గురించి తెలుసుకొని, ఆ పద్ధతులను క్రమం తప్పకుండా పాటించడంలో చాలామంది శ్రద్ధ పెట్టరు. నిజానికి జీవితంలో ఏం కోల్పోయినా మళ్లీ సంపాదించుకోగలం. ఆరోగ్యం, దాన్నుంచి పొందే ఆనందం దూరమైతే సొంతం చేసుకోవడం చాలా కష్టం. ఈ విషయాన్ని గుర్తెరిగి వయసుకి తగిన పోషకాహారాన్ని తీసుకోవాలి.

వయసుకి తగిన ఆహారం...
చిన్న పిల్లలకు మొదటి ఆర్నెల్లు తల్లిపాలు పట్టిస్తే అదే అమృత తుల్యం. రెండేళ్లు వచ్చే వరకూ పాలు, పోషకాలు ఇవ్వడంపై సంపూర్ణంగా శ్రద్ధ పెట్టాలి. ఐదు నుంచి ఏడేళ్లవరకు ఆడపిల్లలకు ఎదుగుదలలో కీలక దశ. ఆ వయసులో వారికి ఇనుము, క్యాల్షియం ఎక్కువ అందాలి. బీ కాంప్లెక్స్‌ విటమిన్లు, మొలకలు, తృణధాన్యాలు, పనీర్‌, ముదురు రంగుల్లో ఉండే పండ్లు, పాల ఉత్పత్తులు, గుడ్లు, గింజల్లో మాంసకృత్తులు, విటమిన్లు ఎక్కువగా ఉంటాయి. ఇక పాలకూరలో క్యాల్షియం, తోటకూరలో ఇనుము పుష్కలం. చదువుకునే, ఆడుకునే పిల్లలకు ఇవి ఎంతో శక్తినిస్తాయి. పన్నెండు, పదమూడేళ్ల వయసు నుంచి ఇనుము, విటమిన్‌ ఎ, ఫోలిక్‌ యాసిడ్‌, కెలొరీలు, మాంసకృత్తులు ఎక్కువగా అందేట్లు చూసుకోవాలి. అప్పుడు సరైన శ్రద్ధ పెట్టకపోతే గర్భధారణ సమయంలో ఇబ్బందులు తలెత్తుతాయి. పిల్లలు, బాధ్యతలు రోజురోజుకీ పెరగడమే కానీ తగ్గేది ఉండదు కదా! ఆ పనులు, ఒత్తిడికి తగినట్టుగా ఆరోగ్యంగా ఉండేందుకు పోషకాహారం తీసుకోవాలి. ఒక మహిళకు రోజుకి పందొమ్మిది వందల కెలొరీలు అవసరం. అవి అందేలా వివిధ రకాల పోషకాహారం తీసుకోవాలి. వయసును బట్టి, ఆరోగ్య తీరుని బట్టిమార్పులు చేసుకుంటూ ఉండాలి.

శ్రద్ధపెడితే.. సమస్యలు పరార్‌
ఇంటా బయటా ఎన్నో బాధ్యతలు నిర్వహించే మహిళలు అనేక సమస్యల బారిన పడుతుంటారు. రక్తహీనత, ఆస్టియోపొరోసిస్‌, రొమ్ము క్యాన్సర్‌, కీళ్లనొప్పులు వాటిల్లో ముఖ్యమైనవి. ఇనుము ఎక్కువగా ఉండే ఆహారం అంటే మాంసకృత్తులు.. బీ కాంప్లెక్స్‌ పదార్థాలు తీసుకోవడం వల్ల రక్తహీనత సమస్య ఉండదు. పాలిచ్చే తల్లులు పోషకాహారంపై అశ్రద్ధ చూపిస్తే ఆస్టియోపొరోసిస్‌ సమస్య ఎదుర్కోవాల్సి ఉంటుంది. చిక్కుళ్లు, గుడ్డు, చేపలు, పనీర్‌, పాలు, పెరుగు.. తీసుకొంటే కీళ్లనొప్పులు సైతం వేధించవు. ఇక మహిళలని అధికంగా వేధించే రొమ్ము క్యాన్సర్‌ నివారణకు... క్యాన్సర్‌ కారకాలను ఎదిరించే యాంటీ ఆక్సిడెంట్లు అధికంగా ఉండే పదార్థాలను తీసుకోవాలి. క్యాబేజీ, కాలిఫ్లవర్‌, బ్రకోలి వంటి వాటిని వారానికి ఐదు సార్లు తీసుకోవడం వల్ల సల్ఫోరఫేన్‌ అనే క్యాన్సర్‌ పోరాట కారకం అందుతుంది. అలాగే రోజుకు మూడు రకాల పండ్లు ఆహారంగా తీసుకొంటే శరీరానికి పుష్కలంగా యాంటీ ఆక్సిడెంట్లు అందుతాయి. బత్తాయి, నిమ్మల నుంచి లైమోనీన్‌... ద్రాక్ష నుంచి రెస్‌వెర్ట్రాల్‌... యాపిల్‌ నుంచి పుష్కలంగా ఫ్లవనాయిడ్లు అందుతాయి. ఫలితంగా క్యాన్సర్‌ సమస్య దరిచేరకుండా చూస్తాయి. బ్లాక్‌ టీ, గ్రీన్‌టీలకు రొమ్ము క్యాన్సర్‌ నివారణకు దోహదం చేస్తాయి.

సందేహాలు వీడితే సంతోషం...
ఆకుకూరలు తింటే విరేచనాలు అవుతాయి.. గుడ్డు తింటే వేడి చేస్తుంది. నువ్వులు వేడిచేస్తాయి. మజ్జిగ మంచిది... కానీ పెరుగు వేడి. నిమ్మ జాతి పండ్లు.. అరటిపండూ జలుబు చేస్తాయి. గోంగూర తింటే మంచిది కాదు. ఇలాంటి నమ్మకాలు మనలో చాలా మందికి ఉంటాయి కానీ.. ఇందులో అవాస్తవాలే ఎక్కువ. ఆకుకూరలు మట్టికి దగ్గరగా పెరుగుతాయి.. కాబట్టి ఇవి సరిగ్గా ఉడికించుకొని తినకపోతే ఇన్‌ఫెక్షన్‌కి దారితీయొచ్చు. అందువల్ల శుభ్రం చేసుకొని తింటే ఎటువంటి సమస్యా ఉండదు. గుడ్డు తింటే వేడా..? అంటే గుడ్డులో మాంసకృత్తులు అధికం. అది తిన్నప్పుడు నీళ్లు అధికంగా తాగాలి. లేకపోతే మూత్రం చిక్కగా వస్తుంది. అంతమాత్రాన అది వేడి చేసిందని కాదు. అలాగే నిమ్మజాతుల పండ్లు తింటే జలుబు రావడం కూడా తప్పే. పడకపోయినా అలర్జీ గుణం ఉన్నా అది ఒకరిద్దరికి మాత్రమే పరిమితం కానీ అందరికీ కాదు.

పోషకాలు భద్రమిలా...
ఉరకలు.. పరుగుల జీవితంలో క్షణం తీరిక లేకుండా చకాచకా పనులు చక్కబెట్టుకోవాలన్నా.. రోజంతా హుషారుగా అడుగులు వేయాలన్నా చక్కని పోషక విలువలున్న ఆహారాన్నే తీసుకోవాలి. అందుకు వండేటప్పుడు కొన్ని జాగ్రత్తలు పాటిస్తే సరిపోతుంది. ఆకుకూరలని మరీ ఎక్కువ మంట మీద వేడిచేస్తే.. వాటి పోషకాలు ఆవిరి అయిపోతాయి. నీటిని తగుమాత్రం ఉపయోగిస్తే కూరగాయలు ఉడకడానికి నీళ్లుసరిపోతాయి. వాటిని పారబోయాల్సిన అవసరం ఉండదు. ఫలితంగా పోషకాలు వృథా కావు. మరీ చిన్న ముక్కలుగా కాయగూరలని తరగడం వల్ల వేడికి పోషకాలు కోల్పోతాయి. బంగాళాదుంపలని వాటి చెక్కుతో సహా ఉడికించడం వల్ల విటమిన్‌ సి కోల్పోకుండా ఉంటాం. మాంసాన్ని అతిగా వేయించడం వల్ల దానిలోని థయామిన్‌ కోల్పోతుంది.

ఆహార నియమాలు....
ఎన్ని చెప్పినా.. చదివినా ఆహార నియమాలను పాటించడం అనేదే ముఖ్యం. భవిష్యత్తులోఎటువంటి చిక్కులు రాకుండా ఉండాలంటే.. చక్కెరలు, ఉప్పు వాడకాన్ని నియంత్రణలో ఉంచుకోవాలి. వేపుళ్లు, రిఫైన్‌డ్‌ ఆహారానికి దూరంగా ఉంటే మేలు. పిల్లలు పుట్టిన తర్వాత శరీర బరువును బట్టి ఆహారం తీసుకోవాలి. వేళాపాళాలేని ఆహార నియమావళి చక్కెర వ్యాధికి కారణం అవుతుంది.

ఈనాడు సౌజన్యంతో