రెవెన్యూ అరాచకం!

రైతుల పేర్ల స్థానంలో ఏపీఐఐసీ పేరు
అనుభవదారుగా అడంగళ్లలో చేరిక
కోర్టులో కేసులున్నా.. పరిహారం ఇవ్వకున్నా నిర్వాకం
ఇళ్ల స్థలాలపైనా కన్ను
రంగారెడ్డి జిల్లా రైతుల్లో ఆందోళన హైదరాబాద్‌, న్యూస్‌టుడే: భూ సేకరణలో ఇదో కొత్తకోణం. రైతుల నోట్లో మట్టికొట్టే దారుణం. రంగారెడ్డి జిల్లాలోని మూడు మండలాల రైతు పొలాల్లో సంభవిస్తున్న 'భూ'కంపం. హార్డ్‌వేర్‌ పార్కు కోసమంటూ ఈ జిల్లాలోని రైతుల్నుంచి భూముల్ని ప్రభుత్వం స్వాధీనం చేసుకొంటున్న తీరు అరాచకాన్ని తలపిస్తోంది. రైతుకు ఒక్కపైసా పరిహారం ఇవ్వలేదు. కానీ వారి పచ్చటి పంట పొలాలు వారి ఆధీనంలో లేకుండా పోతున్నాయి. వందల ఎకరాల్ని ఏపీఐఐసీ అధీనంలో ఉన్నట్టుగా రెవెన్యూ శాఖ అడంగళ్లలో రాసిపడేస్తోంది. ఆఖరికి పంట అనుభవదారు కూడా ఏపీఐఐసీయే అంటూ చిత్రీకరిస్తోంది. కోర్టులో కేసులున్నా ఇలా చేస్తున్నారెందుకంటూ అడగటానికెళ్లిన రైతాంగానికి అధికారుల నుంచి చీత్కారాలు, అవమానాలు ఎదురవుతున్నాయి. ఏం చేస్తారో చేసుకోండనే మొండి సమాధానాలొస్తున్నాయి. రైతుకు ఆమోదయోగ్యమైన విధానాల కోసమంటూ భూ సేకరణ చట్టానికి సవరణలు తేవటానికి కేంద్రం ఓ పక్క సన్నాహాలు చేస్తుండగా.. రాష్ట్రంలో మాత్రం ఇంకా రైతు అన్యాయానికి గురౌతూనే ఉన్నాడు.

రంగారెడ్డి జిల్లా సరూర్‌నగర్‌, ఇబ్రహీంపట్నం, హయత్‌నగర్‌ మండలాల్లోని కొన్ని గ్రామాల రైతులు ఇప్పుడు కంటిమీద కునుకు లేకుండా ఉన్నారు. వీరి భూములు రాష్ట్ర పారిశ్రామిక మౌలిక సదుపాయాల సంస్థ(ఏపీఐఐసీ) స్వాధీనమైపోయినట్టుగా రికార్డుల్లో రాయటం ముమ్మరమయింది. పహాణీ/అడంగల్‌లోని పట్టాదారు గడి(కాలమ్‌)తో పాటుగా భూమి అనుభవదారుడి గడిలో కూడా ఏపీఐఐసీ పేరును రెవెన్యూ అధికారులు చేరుస్తున్నారు. ప్రస్తుతం ఆయా భూములు వరి, కంది తదితర పంటలతో కళకళలాడుతున్నాయి. భూమిని సాగుచేసే వారి పేరును మాత్రమే అనుభదారు గడిలో పొందుపర్చాల్సివుండగా రెవెన్యూ యంత్రాంగం అందుకు భిన్నంగా వ్యవహరిస్తోంది.

సరూర్‌నగర్‌ మండలంలోని నాదర్‌గుల్‌ గ్రామ రైతులకు చెందిన 114 ఎకరాల విలువైన భూములకు ఇలా రికార్డుల్ని మార్చేశారు. రైతుల పేర్లను కొట్టేసి ఏపీఐఐసీ పేరును పొందుపర్చారు. హయత్‌నగర్‌ మండలంలోని తుర్కయాంజల్‌, ఎంఎంకుంట, ఇబ్రహీంపట్నం మండలంలోని ఆదిభట్ల గ్రామాల రైతుల పేర్లనూ తొలగించారు. అడంగల్‌లోని పట్టాదారు గడిలో ఏపీఐఐసీ పేరున్నప్పటికీ అనుభవదారుడిగా తమ పేర్లే ఉంటాయి కాబట్టి తమకు న్యాయం జరగకపోదని రైతులు ఆశపడుతూ వచ్చారు. పహాణీల్లో రైతుల పేర్లను చేర్చేందుకు సన్నాహాలు జరుగుతున్నాయంటూ ఆగస్టు 22వ తేదీన 'ఈనాడు' వెల్లడించింది. ఏకంగా అనుభవదారు పేరును కూడా మార్చేసినట్టు తాజాగా బయటపడింది. రెవెన్యూ యంత్రాంగం నిర్వాకంతో రైతులు తీవ్ర ఆందోళన చెందుతున్నారు. అనుభవదారుడి అధీనంలో గల భూమి విస్తీర్ణం అనే గడిలో కూడా రైతు పూర్తి భూమిని చేరుస్తున్నారు. ఎకరానికి కేవలం రూ.3 లక్షలు పరిహారంగా ఇవ్వజూపటంతో పలువురు రైతులు తమకు జరుగుతున్న అన్యాయంపై హైకోర్టులో కేసులు వేశారు. ఇవి విచారణలో ఉండగానే రెవెన్యూ యంత్రాంగం, ఏపీఐఐసీ కలసి అరాచకం సృష్టిస్తున్నాయి. రికార్డుల్లో మార్పులు చేయాలంటూ పైస్థాయి అధికారుల నుంచి తమకు ఆదేశాలొచ్చాయని, ఈ పని నిలిపేయాల్సిందిగా కోర్టు నుంచి ఏవైనా ఉత్తర్వులొస్తే తప్ప తాము ఆగేది లేదని రెవెన్యూ అధికారులు చెబుతున్నారు. ప్రభుత్వ రిజిస్ట్రేషన్‌ విలువ ఎకరా రూ.38 లక్షలు, బహిరంగ విలువ రూ.60 లక్షలు పలుకుతున్న భూమికి కేవలం రూ.3 లక్షలు ఇస్తామనటం అన్యాయమని రైతులు కన్నీళ్ల పర్యంతమవుతున్నారు. ఐదేళ్ల క్రితమే(2005లో) స్వాధీనం గురించి ప్రకటించిందున అప్పటి విలువలనే పరిగణనలోకి తీసుకొంటామని అధికారులు చెబుతున్నారు. అప్పటి నిర్వాకం ఇప్పుడు రైతుల్ని రోడ్డున పడేసింది.

ఇళ్ల స్థలాలూ స్వాధీనం?
నాదర్‌గుల్‌ గ్రామంలో ఎప్పుడో ఇళ్ల స్థలాలుగా అమ్ముడైపోయిన దాదాపు 400 ఎకరాల్ని కూడా స్వాధీనం చేసుకోవాలని ఏపీఐఐసీ భావిస్తోంది. తొలుత ఇక్కడి 837 ఎకరాలను పట్టా భూములుగా పేర్కొంటూ స్వాధీన ప్రక్రియలో చేర్చింది. ఆ తర్వాత దాన్ని 114 ఎకరాలకు కుదించి మిగతా 723 ఎకరాల్లోనూ చాలావరకు ప్రభుత్వానివేనని తేల్చింది. పెద్దలకు చెందిన, పైరవీలు చేసుకొన్న వారి మరికొన్ని భూములను స్వాధీన ప్రక్రియ నుంచి తప్పించింది. ప్రభుత్వానిదిగా తేల్చిన భూమిలో దాదాపు 400 ఎకరాలు ఎప్పుడో ఇళ్ల స్థలాలుగా మారాయి. వాటికి రిజిస్ట్రేషన్లు కూడా జరిగాయి. ఇప్పుడు ఆ భూమంతా ప్రభుత్వానిదిగా పరిగణిస్తున్నందున ఇళ్ల స్థలాల కొనుగోలుదారులంతా అది పట్టాభూమేనంటూ రెవెన్యూ, ఏపీఐఐసీ అధికారుల చుట్టూ తిరిగి వారిని ప్రసన్నం చేసుకోవాల్సిన అగత్యం ఏర్పడింది. అలా ముందుకురాని వారి భూముల్ని ప్రభుత్వానివిగా పరిగణించి ఒక్కపైసా పరిహారం ఇవ్వకుండానే స్వాధీనం చేసుకొనే అవకాశం ఉంది. స్థలాల్ని కొన్న చాలామంది ఎక్కడెక్కడో ఉన్నందున ఇక్కడి తతంగం వారికి తెలియనేలేదు. ఇళ్ల స్థలాలు అయినందునే స్వాధీన ప్రక్రియ నుంచి ప్రభుత్వం మినహాయింపు ఇచ్చినట్టుగా మరికొందరు భావిస్తున్నారు. వీటికి పక్కనే గల 114 ఎకరాల రైతులు ఇక తమ భూముల్ని ప్రభుత్వం స్వాధీనం చేసుకోబోదనే ఆనందపడుతూ వచ్చారు. అందుకే భూములపై భారీగా పెట్టుబడులు కూడా పెట్టారు. ఒక్కసారిగా రికార్డుల్లో తమ పేర్లను కొట్టివేసి ఏపీఐఐసీ పేరును చేరుస్తుండటంతో వారు అవాక్కయ్యారు.
ఈనాడు సౌజన్యంతో