'టీకా'.. తాత్పర్యం!

ఉచిత మందులకు వందల్లో వసూళ్లు
ప్రైవేటు ఆస్పత్రుల మాయాజాలం
అధికారుల పర్యవేక్షణ ఏదీ?
ప్రచారలోపమూ ప్రధాన కారణమే హైదరాబాద్‌, న్యూస్‌టుడే: అప్పుడే పుట్టిన పిల్లలు ప్రాణాంతకమైన వ్యాధుల బారినపడకుండా ఉండడానికి టీకాలు ఇవ్వాలనేది కేంద్ర ప్రభుత్వ ఉద్దేశం. ఇందుకోసం వందల కోట్ల రూపాయల ప్రజాధనాన్ని వెచ్చిస్తోంది. భారీ ప్రచారాన్ని కూడా నిర్వహిస్తుండడంతో ఇప్పుడు దాదాపుగా గ్రామీణ ప్రాంతాలవారికి వీటిపై అవగాహన పెరిగింది. బిడ్డ పుట్టగానే టీకాలు వేయించుకోడానికి చాలామంది ముందుకువస్తున్నారు.

క్షయ, ధనుర్వాతం, కంఠసర్పి, కోరింతదగ్గు, హెపటైటిస్‌-బి, తట్టు వంటి వ్యాధుల నివారణ కోసం శిశువులకు వీటిని వేయించడం తప్పనిసరి. ఒక్క మన రాష్ట్రంలోనే ఏటా దాదాపు 15 లక్షల మంది పిల్లలకు ఈ టీకాలు వేస్తున్నారు. టీకాలు అందని కారణంగా పిల్లలు ప్రాణాంతక వ్యాధులకు గురికాకూడదనే ఉద్దేశంతో ప్రైవేటు ఆస్పత్రులకు కూడా కేంద్ర ప్రభుత్వం ఉచితంగా వీటిని సరఫరా చేస్తోంది. ఒక్కో పిల్లవాడి మీదా దాదాపుగా రూ.500కు పైగా ఖర్చు చేస్తోంది!

కాని... ఇవన్నీ పూర్తిగా ఉచితమని, కేవలం నామామత్రపు సర్వీసు రుసుముతోనే వీటిని పొందవచ్చనే విషయాన్ని ప్రజలందరికీ చేర్చడంలో ప్రభుత్వం విఫలమవుతోంది. ఫలితంగా ఏటా వందల కోట్ల రూపాయల అవినీతికి, అక్రమ వసూళ్లకు తెరలేస్తోంది!

ఒకవైపు ప్రభుత్వం ఒక్కో చిన్నారి మీద రూ. 500 వరకు ఖర్చుపెడుతుండగా, అంతే మొత్తాన్ని బిడ్డ తల్లిదండ్రులు కూడా వెచ్చించాల్సి వస్తోంది. అంటే ఒకవైపు సర్కారీ సొమ్ము స్వాహా అవుతుండగా మరోవైపు ప్రజల చేతి చమురూ వదులుతోంది.

అప్పన్న శ్రీకాకుళం సమీపంలోని ఓ గ్రామంలో ఉంటున్నాడు. అతని నెల రోజుల పిల్లాడికి క్షయ వ్యాధి రాకుండా నివారించడానికి బీసీజీ టీకా వేయించాలనుకున్నాడు. పట్నంలోని ప్రైవేటు ఆస్పత్రిలో బాగా వేస్తారనే ఉద్దేశంతో అక్కడికి వెళ్లాడు. మొత్తం ఐదు రకాల టీకాలకు కలిపి రూ. 500 వరకు తీసుకున్నారు.

ఇలా రాష్ట్రవ్యాప్తంగా చాలామంది తమ పిల్లలకు మంచి సదుపాయాలు, మంచి మందులు ఇస్తారనే విశ్వాసంతో ప్రైవేటు ఆస్పత్రుల్లో టీకాలు వేయిస్తున్నారు. అత్యధికశాతం అస్పత్రుల్లో వాటి స్థాయినిబట్టి కనీసం రూ. 500 వరకు వసూలు చేస్తున్నారు.

కొన్ని కార్పొరేట్‌ ఆస్పత్రులు మినహా దాదాపు ప్రైవేటు ఆస్పత్రులన్నీ టీకా మందులను ప్రభుత్వం నుంచి ఉచితంగానే తీసుకుంటున్నా చాలా ఆస్పత్రులు పిల్లల తల్లిదండ్రుల నుంచి కూడా సొమ్ము దండుకుంటున్నాయి. ప్రభుత్వంనుంచి ఉచితంగా టీకాలు తీసుకున్న ఆస్పత్రులు ప్రజల నుంచి సర్వీసు ఛార్జీల కింద రూ.25-50 లోపు ఫీజు మాత్రం తీసుకోవాల్సి ఉంటుంది. కాని ఇదెక్కడా అమలు కావడం లేదు. టీకాల గురించి ప్రైవేటు ఆస్పత్రుల్లో ఎలాంటి సూచిక బోర్డులు కూడా ఏర్పాటు చేయకపోవడంతో రాష్ట్రవ్యాప్తంగా అమాయకులు, గ్రామీణులు ప్రైవేటు ఆస్పత్రుల మాయాజాలానికి మోసపోతున్నారు. ఉచితంగా పొందాల్సిన టీకాలకు డబ్బులు చెల్లించాల్సిన పరిస్థితి నెలకొంది.

ఏటా ప్రతి జిల్లాకు అవసరమైన మేరకు టీకా మందులు సరఫరా చేయడం మినహా, వాటి అమలుతీరుపై కుటుంబ సంక్షేమశాఖ ఉన్నతాధికారుల పర్యవేక్షణ లోపించడం వల్లనే ఈ పరిస్థితి నెలకొంది.

ఆడిటింగ్‌ ఏదీ?: రాష్ట్రవ్యాప్తంగా టీకాల సరఫరా, అమలు తీరును పర్యవేక్షించడానికి ప్రజారోగ్య, కుటుంబ సంక్షేమశాఖలో ప్రత్యేకంగా ఒక విభాగాన్ని ఏర్పాటుచేశారు. కేంద్రం నుంచి రాష్ట్రానికి వచ్చే వివిధ రకాల టీకాలను జాగ్రత్తగా శీతల గిడ్డంగుల్లో నిల్వ చేయడం, జిల్లాలకు వాటిని పంపించడం, పిల్లలందరికీ టీకాలు అందేలా పటిష్ఠమైన విధానాల అమలుచేయడం ఈ విభాగం చూడాలి. జిల్లాలకు ఏటా సరఫరా చేస్తున్న టీకా మందులు సక్రమంగా వినియోగిస్తున్నారా? లేదా? అనే దానిపై ఆడిటింగ్‌ నిర్వహించాలి. గత కొన్నేళ్లుగా వైద్యఆరోగ్యశాఖలో ఈ ఆడిటింగ్‌ చేయడంలేదని అక్కడ పనిచేసే అధికారులే అంగీకరిస్తున్నారు. జిల్లా కేంద్రాల్లో అవసరాల మేరకు టీకా మందులు పంపించాలని వైద్యాధికారుల నుంచి సమాచారం అందగానే, హైదరాబాద్‌ నుంచి అందుకు అనుమతి ఇస్తున్నారు. గతంలో ఇచ్చిన టీకా మందులు ఎవరికి ఇచ్చారు? దానికి సంబంధించిన రికార్డులు పంపించమనిగానీ, టీకా విభాగాన్ని పర్యవేక్షించే ఉన్నతాధికారులు జిల్లాలకు వెళ్లి వాస్తవ పరిస్థితిపై సమీక్షించడంగానీ జరగడంలేదు. వైద్యఆరోగ్యశాఖ ఇకనైనా... టీకాల కార్యక్రమంపై ప్రత్యేక దృష్టి సారించి ప్రైవేటు ఆస్పత్రుల దోపిడీని అరికట్టాల్సిన అవసరం ఉంది.

నిబంధనలివి:
* ప్రభుత్వం నుంచి టీకా మందులు తీసుకునే ప్రైవేటు ఆస్పత్రుల్లో ఉచితంగా మందును ఇవ్వాలి. సర్వీసు ఛార్జీల కింద రూ.25-50లోపు మాత్రమే తీసుకోవాలి.
* టీకా మందులు ఉచితంగా ఇస్తామని ఆస్పత్రికి వచ్చే వారికి కనిపించేటట్లు ప్రత్యేక సూచికలు ఏర్పాటుచేయాలి.
* ప్రతి నెలా ఎంత మంది పిల్లలకు టీకాలు ఇచ్చినది, జిల్లా వైద్యాధికారులకు సమాచారం అందించాలి.
* ప్రైవేటు ఆస్పత్రుల్లో టీకాల కోసం ప్రత్యేకంగా రికార్డులు నిర్వహించాలి.
* ప్రతి సంవత్సరం ప్రైవేటు ఆస్పత్రులకు ఇస్తున్న టీకా మందులకు సంబంధించి ఆడిటింగ్‌ నిర్వహించాలి.
* టీకా మందుల వినియోగంలో ప్రైవేటు ఆస్పత్రుల్లో అక్రమాలు జరిగినట్లు నిర్ధారణ అయితే సంబంధిత యాజమాన్యంపై కేసు నమోదు చేయాలి.
* పిల్లలందరికీ టీకాలు ఇవ్వాల్సిన ఆవశ్యకతపై ప్రజారోగ్య, కుటుంబసంక్షేమశాఖ ప్రత్యేకంగా ప్రచారకార్యక్రమాలు నిర్వహించాలి
ఈనాడు సౌజన్యంతో