మూవీ మొఘల్‌కి ఫాల్కే కిరీటం

రామానాయుడికి ప్రతిష్ఠాత్మక పురస్కారం
న్యూఢిల్లీ, హైదరాబాద్‌-న్యూస్‌టుడే ప్రముఖ సినీ నిర్మాత డాక్టర్‌ దగ్గుబాటి రామానాయుడి(74)కి ప్రతిష్ఠాత్మక దాదా సాహెబ్‌ ఫాల్కే పురస్కారం దక్కింది. భారత చలనచిత్ర రంగానికి ఆయన చేసిన విశేష కృషిని గుర్తించి 2009 సంవత్సరానికి గాను ఈ పురస్కారం అందచేయనున్నారు. అక్టోబరులో గోవాలో నిర్వహించనున్న అంతర్జాతీయ చలనచిత్రోత్సవం సందర్భంగా అవార్డు అందిస్తారు. దీని కింద 'స్వర్ణకమలం', రూ.10లక్షల నగదు అందించి శాలువాతో సత్కరిస్తారు. ''నాకు దక్కిన గౌరవంగా భావిస్తున్నా. 45 సంవత్సరాలుగా తెలుగు చిత్రరంగానికి నిబద్ధతతో సేవలందిస్తున్నా. ఇప్పటికీ ప్రయోజనాత్మక, ఆరోగ్యకర వినోదం ఉండే చిత్రాలు అందిస్తున్నా. భవిష్యత్తులోనూ సమాజానికి శాయశక్తులా సేవలందించాలన్నది నా కోరిక'' అని అరకులో తన తాజా చిత్రం చిత్రీకరణలో ఉన్న రామానాయుడు స్పందించారు. భారత చలనచిత్రరంగానికి, తెలుగు చలనచిత్రరంగానికి, ప్రేక్షకులకు ఈ సందర్భంగా ఆయన కృతజ్ఞతలు తెలిపారు.

దాదాపు రెండు దశాబ్దాల తరవాత తెలుగు చిత్రసీమ ఫాల్కే పురస్కారంతో పులకరించింది. మూవీ మొఘల్‌గా గుర్తింపు పొందిన రామానాయుడికి ఈ విశిష్ట పురస్కారం ఏనాడో రావాల్సిందని ప్రతి సినిమా వ్యక్తీ చెబుతాడు. సినిమాపై ఉన్న వ్యామోహంతో రంగుల లోకంలోకి అడుగుపెట్టారు రామానాయుడు. శంభు ఫిలిమ్స్‌ నిర్మించిన 'నమ్మిన బంటు' చిత్రంలో ఆయన తండ్రి భాగస్వామి. ఈ సినిమా చిత్రీకరణ స్వగ్రామం కారంచేడులో చేసిన సమయంలో నిర్మాణ వ్యవహారాల్ని శ్రద్ధగా పరిశీలించారు. రామానాయుడు ఆ చిత్రంలో కల్టెకర్‌ పాత్రలో తళుక్కున మెరిశారు. అటు తరవాత కొన్నాళ్లు కుటుంబానికి సంబంధించిన వ్యాపారాలు చూసుకొన్నారు. నిజానికి ఆయన చిన్ననాటి కల డాక్టరు కావాలని. కళాశాలలో చేరిన తరవాత నాటకాలపై ఆసక్తి పెరగడంతో చదువుపై శ్రద్ధ తగ్గింది. 'నమ్మిన బంటు' తరవాత సినిమా నిర్మాణంపై ఆసక్తి పెరిగింది. అనురూప అనే చిత్ర నిర్మాణ సంస్థ నిర్మించిన 'అనురాగం' చిత్రంలో భాగస్వామిగా చేరారు. అది ఆర్థికంగా నష్టాన్ని మిగిల్చింది. ఆ తరవాతే సురేష్‌ ప్రొడక్షన్స్‌ సంస్థను స్థాపించారు. రచయిత డి.వి.నరసరాజు చెప్పిన కథతో 'రాముడు భీముడు' చిత్రాన్ని నిర్మించారు. ఎన్టీ రామారావు కథానాయకుడిగా నటించారిందులో. నిర్మాతగా తొలి చిత్రమే ఘన విజయం సాధించడంతో ఉత్సాహంగా 'ప్రతిజ్ఞ పాలన', 'శ్రీకృష్ణతులాభారం', 'స్త్రీ జన్మ' చిత్రాలు నిర్మించారు. ఆ సమయంలోనే విజయ సంస్థతో చేతులు కలిపి కొన్ని చిత్రాలు తీశారు. 1971లో వచ్చిన 'ప్రేమ్‌నగర్‌'కి ముందు నాయుడు తీసిన చిత్రాలు పరాజయం పాలయ్యాయి. అయినా ధైర్యంగా 'ప్రేమ్‌నగర్‌' తీశారు. ఈ సినిమాకి కొబ్బరికాయ కొట్టిన రోజే చెప్పారట... 'ఈ సినిమా విజయవంతమైతే ఇక్కడే ఉంటా. లేకపోతే వ్యవసాయం చేసుకొంటా' అని. భారీ విజయాన్ని సాధించడంతో నాయుడు సినీ నిర్మాణ ప్రస్థానం కొనసాగుతూనే ఉంది.

గిన్నిస్‌ రికార్డు
ప్రపంచంలోనే అత్యధికంగా చిత్రాలు తీసిన నిర్మాతగా గిన్నిస్‌ బుక్‌ ఆఫ్‌ వరల్డ్‌ రికార్డ్సులో రామానాయుడు పేరు నమోదైంది. ఇప్పటి వరకూ అన్ని భాషల్లోనూ కలిపి 135 చిత్రాలు నిర్మించారు. మన దేశంలో పంజాబీలో మినహా దాదాపు అన్ని భాషల్లోనూ నిర్మించారు. 'కరెన్సీ నోటు మీదున్న అన్ని భాషల్లోనూ సినిమాలు తీయాలన్నది నా తపన' అంటారాయన. తెలుగుతోపాటు తమిళ, హిందీ, కన్నడ, మలయాళ, ఒరియా, గుజరాతీ, మరాఠీ, బెంగాలీ, భోజ్‌పురి లాంటి అనేక భాషల్లో సురేష్‌ ప్రొడక్షన్స్‌ చిత్రాలొచ్చాయి. తను నిర్మించే ప్రతి చిత్రంలోనూ అతిథి పాత్రల్లో కనిపించడం ఆయనకు సరదా. 'హోప్‌'లో పూర్తి నిడివి పాత్రను పోషించి తనలోని నటుణ్ని అందరికీ చూపించారు. ఇది అంతర్జాతీయ చిత్రోత్సవాల్లో ప్రదర్శితమైంది. 1976లో నిర్మించిన 'సోగ్గాడు' చిత్రం తాష్కెంట్‌ చిత్రోత్సవాల్లోనూ, 1993లో తీసిన 'సూరిగాడు' భారత చిత్రోత్సవాల్లోనూ ప్రదర్శితమైంది. 1999లో నిర్మించిన బెంగాలీ చిత్రం 'అసుఖ్‌'కు జాతీయ పురస్కారం లభించింది. 'హమారీ బేటీ' చిత్రం షికాగో, వెనిస్‌ చిత్రోత్సవాల్లో ప్రదర్శితమై ప్రశంసలు పొందింది.

అదే ఉత్సాహం
ప్రస్తుతం 'ఆలస్యం అమృతం' అనే చిత్రాన్ని తీస్తున్నారు. డెబ్బైనాలుగేళ్ల వయసులో కూడా ఆయన నిర్మాతగా ఎక్కడా తన వేగాన్నీ, ఉత్సాహాన్నీ తగ్గించలేదు. నేటికీ సెట్‌లో ఉండి అన్ని వ్యవహారాల్నీ పర్యవేక్షిస్తారు. పక్కాగా స్క్రిప్టు ఉంటేనే చిత్రీకరణ ప్రారంభించే అతికొద్ది మంది నిర్మాతల్లో రామానాయుడు ఒకరు. సినిమా అంటే నవరస భరితంగా ఉండాలన్నది ఆయన సిద్ధాంతం. చలనచిత్ర నిర్మాణంతో పాటు హైదరాబాద్‌, విశాఖపట్టణాల్లో స్టూడియోలు, రికార్డింగ్‌, ప్రివ్యూ, డబ్బింగ్‌ థియేటర్లు, ల్యాబ్‌లు నెలకొల్పారు. పంపిణీ రంగంలోనూ ఉన్నారు. 23 మంది దర్శకుల్ని, పలువురు నటీనటుల్నీ, సాంకేతిక నిపుణుల్నీ తెలుగు చిత్రసీమకి పరిచయం చేశారు. నందమూరి తారకరామారావు, అక్కినేని నాగేశ్వరరావు, శివాజీగణేశన్‌, చిరంజీవి, కమల్‌హాసన్‌, రజనీకాంత్‌, జమున, హేమమాలిని, రేఖ, శ్రీదేవి సహా పలువురు అగ్రనటీనటులతో ఆయన పనిచేశారు.

రామానాయుడు వారసులు కూడా చిత్ర పరిశ్రమలోనే పేరు తెచ్చుకున్నారు. తండ్రి బాటలోనే పెద్ద కుమారుడు సురేష్‌ కూడా నిర్మాతగా వ్యవహరిస్తున్నారు. వెంకటేష్‌ నేటి అగ్ర కథానాయకుల్లో ఒకరు. సురేష్‌ కుమారుడు రానా కూడా 'లీడర్‌'తో కథానాయకుడయ్యారు. మరో హీరో నాగచైతన్య కూడా ఆయన మనవడే.

సామాజిక సేవలో: సామాజిక, రాజకీయ రంగాల్లోనూ నాయుడు తనదైన ముద్రవేశారు. 1999లో బాపట్ల నియోజకవర్గం నుంచి తెదేపా తరఫున పోటీచేసి పార్లమెంట్‌ సభ్యుడయ్యారు. తిరుమల తిరుపతి దేవస్థానం పాలక మండలి సభ్యుడిగా సేవలందించారు.రామానాయుడు ఛారిటబుల్‌ ట్రస్ట్‌ ద్వారా వివిధ అభివృద్ది కార్యక్రమాలు చేపట్టారు. మెదక్‌జిల్లా నర్సాపూర్‌లో వృద్ధాశ్రమాన్ని ఏర్పాటు చేశారు. 1996లో శ్రీ వేంకటేశ్వర విశ్వవిద్యాలయం ఆయనకు గౌరవ డాక్టరేట్‌ని ప్రదానం చేసింది.

ఈనాడు సౌజన్యంతో