నగరాన్ని వణికిస్తున్న మరో విషజ్వరం

నగరంలో టైఫాయిడ్, మలేరియా వంటి జ్వరాలు ఒకదానితో ఒకటి పోటీ పడుతుండటంతో హైదరాబాద్‌ నగర వాసులు బెంబేలెత్తిపోతున్నారు. వీటికి తోడు ఇప్పుడు మరో భయంకర విషజ్వరం నగరవాసులను వణికిస్తోంది. స్క్రబ్ టైఫస్ అనే ఈ జ్వరం చలికాలం రాకముందే నగరాన్ని కుదిపేస్తోంది. పార్కులు, కొండ ప్రాంతాల్లో ఉండే ఒక రకమైన పురుగులు కుట్టడం వల్ల ఈ స్క్రబ్ టైఫస్ వ్యాపిస్తుంది. టైఫాయిడ్ తరహాలోనే స్క్రబ్ టైఫస్ అంటుకుంటే వదలదు. కనీసం రెండు రోజుల నుంచి నెల రోజుల పాటు ఈ జ్వరం ఉంటుంది. చికిత్స ఆలస్యమైతే ఏకంగా ప్రాణాలనే మింగేస్తుందని ప్రముఖ్య వైద్యులు నాగేందర్ తెలిపారు.
గుర్తించడం ఎలా..?
 ఈ స్క్రబ్ టైఫస్‌ను గుర్తించడం చాలా కష్టం. ఎక్కడైతే పురుగు కుడుతుందో ఆ ప్రాంతమంతా నల్లగా మారుతుంది. ఇదొక్కటే ఈ విషజ్వరాన్ని గుర్తించడానికున్న మార్గం. వైద్యులు కూడా మొదట టైఫాయిడ్ ట్రీట్‌మెంట్ చేస్తారు. అప్పటికీ తగ్గకపోతే స్క్రబ్ టైఫస్‌గా నిర్ధారిస్తారు. రాష్ట్రంలో ఇపుడిప్పుడే ఈ విషజ్వరం బయటపడుతోందని.. హిమాచల్‌ప్రదేశ్, ఢిల్లీ, జయ్‌పూర్‌లలో దీని ప్రభావం తీవ్ర స్థాయిలో ఉందని నాగేందర్ తెలిపారు. జ్వరమే కదా అని నిర్లక్ష్యం చేయకూడదని..ఏ రకమైన జ్వరాలు ఉన్నా వెంటనే వైద్యలను సంప్రదించాలని ఈ సందర్భంగా డాక్టర్లు సూచిస్తున్నారు.