ఒక 'హిట్' జీవితాన్నే మార్చేసింది.!

సినీ రంగంలో రాణించాలంటే బ్యాక్ గ్రౌండ్, లక్ తో పాటు టాలెంట్ ఉండాలి. కొన్ని సార్లు టాలెంట్ ఉన్న సక్సెస్ సాధించలేక ఇబ్బంది పడాల్సి వస్తుంది. సహజంగా ఏ రంగంలో నైనా ఇదే ఫార్ములా వర్తిస్తుంది. అయితే సినిమాలో నటించడానికి వచ్చిన హీరోలు గానీ, హీరోయిన్ లు గానీ ఒక్క సినిమాతోనే స్టార్ అయిపోరు. ఎదో ఒక సినిమా హిట్ అవుతే తప్ప అప్పటి వరకు ఇండస్ట్రీలో నిలదొక్కుకోవడం చాలా కష్టం. ఆ హిట్.. హీరో రూపంలో రావచ్చు, దర్శకుడి రూపంలో రావచ్చు. అయితే ఇప్పుడు ఉన్న మన టాలీవుడ్ టాప్ హీరోయిన్ లు కూడా అలా వచ్చిన వారే. కొత్తలో హిట్ లు లేక ఇబ్బంది పడ్డ వారు చాలామంది ఉన్నారు. అసలు నటించడమే రాదు అనే స్థితి నుంచి ఇప్పుడు సినిమాలో నటించడానికి ఆ హీరోయిన్ మాత్రమే కావాలి అనే స్థాయికి ఎదిగారు. అలా ఎదిగిన హీరోయిన్ లలో శ్రుతి హాసన్, తమన్నా, సమంత, కాజల్ ల గురించి ముఖ్యంగా చెప్పుకోవచ్చు. వీరు సినిమా ఎంట్రీ కొత్తలో హిట్లు లేక ఒకానొక సమయంలో ఇక వీరు పనికి రారు అనే స్థితి నుంచి ఇప్పుడు టాలీవుడ్ టాప్ హీరోయిన్లు గా నిలబడ్డారు. అయితే ఈ హీరోయిన్లు ఎలా ఇబ్బందిపడ్డారు. వారి హిట్ ఇచ్చిన సినిమాలేంటివి, సక్సెస్ కు గల కారణాలు మన ట్రెండ్ గురు తెలుసుకుందాం..

ఐరన్ లెగ్ నుంచి.. గోల్డెన్ లెగ్ వరకు..

  'శ్రుతీ హాసన్'.. ఇప్పుడు టాలీవుడ్ లో సక్సెస్ ఫుల్ హీరోయిన్. టాప్ హీరోలతో యాక్ట్ చేస్తూ నెం1 రేస్ లో దూసుకుపోతుంది. కానీ ఒకప్పుడు శ్రుతి అంటే టాలీవుడ్ లో 'ఐరెన్ లెగ్' అనేవారు. ఆమె ఏ సినిమాలో అడుగుపెడితే ఆ సినిమా అట్టర్ ఫ్లాప్ అని, శ్రుతితో సినిమా చేస్తే ప్రొడ్యూసర్ ఆస్తులు అమ్ముకోవాల్సిందేనని టాక్. ఇక శ్రుతిహాసన్ పని అయిపోయింది, సినిమా ఆఫర్స్ రావడం కష్టం అనుకుంటున్న టైంలో 'గబ్బర్ సింగ్' ఆఫర్ ఆమె సినీ లైఫ్ నే మార్చింది. 'ఐరెన్ లెగ్ కాస్తా.. గోల్డెన్ లెగ్' అయింది. స్టార్ హీరోలతో సినిమాలు చేస్తూ సక్సెస్ ఫుల్ హీరోయిన్ అయిపోయింది ఈ ముద్దుగుమ్మ. మరి ఈ ఫ్లాప్ హీరోయిన్ని భాగ్యలక్ష్మిలా మార్చిన క్రెడిట్ మాత్రం 'గబ్బర్ సింగ్'తో పవన్ కు దక్కుతుంది. సాధారణంగా ఐరెన్ లెగ్ గా స్టాంప్ పడ్డ హీరోయిన్ని అసలు స్క్రిప్ట్ లోకి కూడా రానివ్వరు. కానీ నథింగ్ ని కూడా సమ్ థింగ్ డిఫరెంట్ గా చేసే 'పవర్ స్టార్'.. అట్టర్ ఫ్లాప్ లతో గ్రౌండ్ లెవల్ కి పడిపోయిన ఈ హీరోయిన్ ను సెలక్ట్ చేసుకొని 'గబ్బర్ సింగ్'తో హిట్ ఇచ్చాడు.

ఇక 'గబ్బర్ సింగ్' సినిమాతో శ్రుతిహాసన్ గ్రాఫే మారిపోయింది. పాసింజర్ లా సాగుతున్న శ్రుతి కెరీర్ జెట్ స్పీడ్ దూసుకుపోతోంది. ఈ సినిమాతో ఫ్లాప్ హీరోయిన్ కాస్తా భాగ్యలక్ష్మిలా మారింది. ఇప్పుడు స్టార్ హీరోలతో సినిమాలు చేస్తూ టాప్ ప్లేస్ కి రీచ్ అవుతోంది ఈ పిల్లికళ్ల భామ. ఇక ప్రస్తుతం శ్రుతి యాక్ట్ చేసిన రెండు సినిమాలు రిలీజ్ కి రెడీ అయ్యాయి. ఇక ఈ సినిమాలు హిట్ అయితే శ్రుతి టాలీవుడ్ నెం1 ప్లేస్ కి రీచ్ అయినట్లేనని అంటున్నారు సినీ విశ్లేషకులు.

బాలీవుడ్ లో ఎంట్రీ ఇచ్చిన ఆఫర్స్ లేవు..

'తమన్నా'..'చాంద్ సా రోషన్ చెహ్రా' అనే బాలీవుడ్ సినిమాతో ఎంట్రీ ఇచ్చింది. ఇక ఎంట్రీయే బాలీవుడ్ సినిమా అయితే హీరోయిన్ లెవల్ ఓరేంజ్ లో ఉంటుంది. ఆఫర్స్ వెల్లువలా వచ్చి పడతాయి. కానీ ఈ మిల్కీబ్యూటీకి ఇవన్నీ రివర్స్ అయ్యాయి. డెబ్యూ మూవీనే డిజాస్టర్ అవడంతో 'బీటౌన్' లో ఆఫర్స్ కరువయ్యాయి. ఇక ముంబైలో లాభం లేదనుకొని హైదరాబాద్ కి మకాం మార్చింది తమన్నా.

టాలీవుడ్ లో 'మనోజ్' తో కలిసి 'శ్రీ' సినిమా చేసింది తమన్నా. బట్ తెలుగులో ఫస్ట్ మూవీ కూడా ఫట్ అయ్యింది. దీంతో టాలీవుడ్ నుంచి కోలీవుడ్ కి షిప్ట్ అయ్యింది. కానీ అక్కడ కూడా కలిసి రాలేదు. ఇక తమన్నా పని అయిపోయిందని అందరూ అనుకుంటుండగా 'హ్యాపీడేస్' స్టార్ట్ అయ్యాయి తమ్మూ బేబీకి. శేఖర్ కమ్ములా రూపంలో ఆమెను హిట్ దేవుడు కరుణించాడు. టాలీవుడ్ లో తమన్నాకి ఫస్ట్ హిట్ నిచ్చి, స్టార్ హీరోయిన్ని చేసింది 'హ్యాపీడేస్' సినిమా. దీంతో తమిళంలో కూడా తమ్మూబేబికి క్రేజీ ఆఫర్స్ వచ్చాయి.

కానీ టాలీవుడ్ లో మళ్లీ కష్టాలు ప్రారంభమయ్యాయి. తెలుగులో చేసిన 'కాళిదాస్', 'కొంచెం ఇష్టం కొంచెం కష్టం' ఫ్లాప్ లు మూటగట్టుకోవడంతో టాలీవుడ్ ఆఫర్స్ కరువయ్యాయి. సరిగ్గా అదే సమయంలో '100% లవ్' రూపంలో హిట్ వరించింది ఈ మిల్కీ బ్యూటీకి. ఇక ఈ సినిమాతో ఈ సొగసరి ఫేటే మారిపోయింది. 100% హిట్ తో టాలీవుడ్ టాప్ హీరోయిన్ అయిపోయింది తమన్నా. చైతూ ఇచ్చిన హిట్ తో సౌత్ తో పాటు, బాలీవుడ్ లోను భారీ ఆఫర్స్ అందుకుంటోంది ఈ మిల్కీ బ్యూటీ.

డెబ్యూ మూవీతోనే స్టార్ అయ్యింది..

'సమంత'.. డెబ్యూ మూవీతోనే తెలుగు ప్రేక్షకులను మాయచేసింది సమంతా. 'ఏంమాయ చేసావే' సినిమాలో గ్లామర్, యాక్టింగ్ స్కోప్ ఉన్న రోల్ ని ఎంతో మెచ్యూర్డ్ గా చేసి, ఔరా అనిపించింది. మొదటి సినిమాతోనే ఫ్యాన్ ఫాలోయింగ్ ని సంపాధించుకొని, స్టార్ హీరోయిన్ అయిపోయింది. 'నాగచైతన్య'తో కలిసి చేసిన 'ఏమాయ చేసావే' సినిమాతో స్టార్ గా మారింది.

ఫస్ట్ సినిమానే సమంతాకి భారీ ఆఫర్స్ తెచ్చిపెట్టింది. సమంతా మాయకి ప్రేక్షకులతో పాటు హీరోలు కూడా పడిపోయారు. యంగ్ స్టర్స్, సీనియర్ హీరోస్ అనే తేడా లేకుండా అందరూ సమంతా పాటే పాడుతున్నారు. ఇక డైరెక్టర్స్ నుంచి నిర్మాతల వరకు సినిమా స్టోరీ ఏదైనా ఆమె ఉండాల్సిందే అంటున్నారు. ఈ కేరళకుట్టి మాత్రం స్టార్ హీరోయిన్ అయ్యానంటే అంతా 'గౌతమ్ మీనన్' ఆశిస్సులేనంటోంది. ఏమాయ చేసావే ఆఫర్ తోనే క్రేజీ హీరోయిన్ అయ్యానని, ఈ సినిమాలేకపోతే హీరోయిన్ గా కనిపించేదాన్ని కాదని అంటోంది సమంత.

మగధీర వరకు ఎన్నో పాట్లు ..

 'కాజల్ అగర్వాల్'.. ప్రస్తుతం తెలుగు, తమిళ్లో టాప్ హీరోయిన్. సీనియర్ హీరోలు, యంగ్ స్టర్స్ అనే డిఫరెన్స్ లేకుండా అందరితో యాక్ట్ చేసి సౌత్ స్టార్ హీరోయిన్ అయింది. 'లక్ష్మీకళ్యాణం'తో టాలీవుడ్ కి ఎంట్రీ ఇచ్చింది కాజల్. కానీ ఈ 'బంతి పూల జానకి'కి లక్ష్మీ కళ్యాణం లక్ తెచ్చిపెట్టలేదు. ఆ తర్వాత కృష్ణవంశీ దర్శకత్వంలో వచ్చిన 'చందమామ' కాజల్ కి కాస్త హిట్ టేస్ట్ ని చూపించింది. తెలుగులో భారీ ఆఫర్స్ తెచ్చిపెట్టింది కాని టాప్ హీరోయిన్ న్ని చెయ్యలేకపోయ్యాయి.

ఎలాగోలా సినీకెరీర్ ని గూడ్స్ ట్రైన్ లా లాక్కొస్తున్న కాజల్ ని 'రామ్ చరణ్' స్టార్ హీరోయిన్ని చేశాడు. రాజమౌళి డైరెక్షన్లో వచ్చిన మగధీర సినిమాతో చెర్రీ, కాజలిద్దరూ టాలీవుడ్ టాప్ స్టార్స్ అయిపోయారు. ఆతర్వాత భారీ ఆఫర్స్ అందుకొని కాజల్ నెం1 కి రీచ్ అయ్యింది. టాలీవుడ్, కోలీవుడ్ ల్లోనే కాదు, బాలీవుడ్ లోను స్టార్ ప్లేస్ కొట్టేసింది కాజల్.

ఇప్పుడు టాప్ రేస్ లో ఉన్న హీరోయిన్స్ అందరూ ఏదో ఒక ఆఫర్ తోనే ఫ్లాప్ నుంచి హిట్ లిస్ట్ లోకి చేరినవారే. తనదైన సినిమా వస్తే నెం1 ర్యాంక్ నుంచి ఎవరినీ, ఎవరు అడ్డుకోలేరని, ప్రూవ్ చేస్తున్నారు మన హీరోయిన్స్. ప్రతీ ఒక్కరికి ఫస్ట్ హిట్ ఎంతో విలువైనదని, ఆఫస్ట్ కిక్కే లక్కీ మస్కట్ అవుతుందని అంటున్నారు సినీ విమర్శకులు.