ఏకాగ్రతకు ఇలా చేయండి

ఆధునిక జీవన విధానం మానవుని జీవన విధానాన్నే మార్చివేసింది. ఒకప్పుడు అన్నం తినేటప్పుడు ఇంట్లో

అందరూ కలిసి కింద కూర్చొని తినేవారు. కాని ఇప్పుడు ఎవరికి ఆకలి వేస్తే వారే తింటారు. అది కూడా డైనింగ్‌ టేబుల్‌ మీద కూర్చొని. దీనితో నడుము, తొడల భాగాలలో అదనంగా కొవ్వు పేరుకుపోతుంది. అలానే ఒకప్పటిలా ఈ కాలం పిల్లలు దేని మీద ఏకాగ్రత చేయలేకపోతున్నారు. అన్ని విషయాలనూ ఒకేసారి నేర్చుకోవాలనే తాపత్రయం వాళ్ళది. కాని చేసే పనిపై, చదువుపై ఏకాగ్రత లేనప్పుడు ఉపయోగమేముంది? ఇలాంటి సమస్యలకు చక్కని పరిష్కారం పద్మాసనం.
పద్మాన్ని పోలి ఉంటుంది కనుక దీనికి పద్మాసనం అని పేరు వచ్చింది.
ఎలా వేయాలి?
         రెండు కాళ్ళను చాపి కింద కూర్చోవాలి. ముందుగా కుడికాలి పాదం ఎడమ కాలి తొడపై, ఎడమ కాలిపాదాన్ని కుడి కాలి తొడపై ఉంచి కూర్చోవాలి. రెండు చేతులను కాళ్ళపై ఉంచి నిటారుగా ఎలాంటి ఆలోచనలు లేకుండా, శ్వాసపై ఏకాగ్రతా దృష్టి నిలపాలి. ఇదే పద్మాసనం. ఇలా ఎంతసేపు ఉండగలిగితే అంతసేపు ఉండి తర్వాత కాళ్ళను మెల్లగా చాపి విశ్రాంతి తీసుకోవాలి.
ఇప్పుడున్న పరిస్ధితుల్లో కింద కూర్చోవడం తగ్గింది. అందువల్ల కాళ్ళు మడచడం కష్టమవుతున్నది. అందుకే కొందరు పూర్తి పద్మాసనం వేయలేకపోవచ్చు. ఇలాంటి పరిస్ధితుల్లో ఒక కాలిపాదం రెండవ కాలి తొడ మీద ఉంచి రెండవ కాలు మొదటి కాలి మోకాలి కింద ఉంచే విధానాన్ని అభ్యసించాలి. కొద్ది రోజులు ఈ విధంగా అభ్యాసం చేస్తే పద్మాసనం వేయడం తేలికవుతుంది.
లాభాలు
        ఎక్కువ సేపు కదలకుండా ఈ అసనంలో కూర్చోవడం వల్ల తొడలలోని అనవసరపు కొవ్వు కరుగుతుంది. మానసిక అలసటను తగ్గిస్తుంది. ఏకాగ్రత కలగడానికి ఇది ఉత్తమమైన ఆసనం.